السلام عليكم ورحمة الله وبركاته.
موضوع اليوم يتكلم عن خطوات بسيطة تساعدك على تعلم اللغة الأنجليزية وتحدثها. وعشان أسهل عليكم الفهم بأشبه متعلم
اللغة بالطفل الي توه يتعلم اللغة والتحدث. أول شيء الطفل يراقب أهله والناس الي
حوله ويقلدهم ويبدأ ينطق مفردات بعدين كلمات وجمل وممكن يكون تركيبها غلط ولكن بعد
فتره يتعلم انه في قاعدة يمشي عليها الي هيه فاعل فعل مفعول به وبعدين يتطور للجمل
المقعدة. بعدها يتعلم كتابة الحروف والأرقام وبعدين تكوين الجمل ... إلخ.
عندنا في نظام التعليم العكس قاعد
يصير. يعني يركزون على الإملاء والقواعد أكثر من التركيز على الفهم والتحدث.
ويطلعون شبابنا وبناتنا من المرحلة الثانوية وهما مو قادرين يركبون جملتين على بعض ويكون
النطق عندهم معدوم. بأعدد لكم 5 أشياء بتساعدكم بإذن الله على تطوير مهارة التحدث عندكم.
#1
خلي قواعد اللغة الإنجليزية على جنب وركزي على
مفردات اللغة (vocabulary words)
أساس اللغة هو المفردات. أيش الفائدة
من معرفة القواعد من غير المفردات. احفظي قد ماتقدرين وحاولي تكون الكلمات لها
علاقة بحياتك اليومية عشان ماتنسينها. برضو حاولي يكون لكل كلمه عندك مقابلها
بالأنجلش! يعني مثلا وأنتي منسدحه في غرفتك, ناظري وش فيها... سرير/ لمبه/ دولاب؟
طيب تعرفي مقابلها بالأنجلش؟ تمام. والي ماتعرفي معانيها ابحثي عنها وعن نطقها
واحفظيها. أفضل طريقه استخدمي الستيكي نوتس وحطيها جنب مكتبك أو سريرك يعني المكان
الي تقعدي فيه دايما واقريها كل يوم عشان ماتنسين! خلي موقع ترجمة قوقل (Google
translate)
صديقك الصدوق. كل ما طرت على بالك كلمة ابحثي عنها واسمعي نطقها وكرريها واحفظيها.
#2
طوري لغتك وأكتسبي ثقافة اللغة
أسهل شي هوه تفرجي برامج او أفلام
أجنبيه بكثره علشان تتعرفين ع تراكيب الجمل والمصطلحات المستخدمه وما تنسي اللغه.
اسمعي بودكاستات وإذاعة اجنبية وتفرجي مقاطع يوتوب. أغمري نفسك باللغة الانجليزية
وحولي لغة أجهزتك من عربي لأنجلش. لأننا عايشين في بلد ما يتدحدث اللغة الأنجليزية
وما فيه امكانية انك تتكلمين مع (native speaker) وتتعلمين اللغة من مصدرها. في البداية راح تستصعبين الشيء بس
بعدين بيصير شيء عادي. اللغه الي قاعدين يعلمونا في الكتب كثير منها مو عمليه
ورسميه. ممكن ما تحسي بالفرق ع طول بس عطي نفسك فرصه وفجأة حتلاحظين انك تعرفين
كلمات بس ما عمرك تعلمتيها بس مخك خزنها.
#3
المواقف الافتراضية (hypothetical situations)
دائما تخيلي نفسك في مواقف افتراضيه
وشوفي تقدرين تكونين محادثه أو لا! مثلا عند الطبيب أو مطعم. إذا لا! فالازم
تبدأين تبحثين عن المصطلحات الي ماتعرفينها وتحفظينها وتستخدمينها في جمل مفيدة. وفيه
كتاب رائع ممكن تلقونه في جرير أو العبيكان انصحكم فيه وراح يفيدكم جدا في المصطلحات
"OXFORD PICTURE DICTIONARY" كبير ولونه أسود.
#4
لا وألف لاااا للخوف والحياء
حاولي تسوين قروب مع صديقاتك وتتكلموا
انجلش فقط من غير عربي. لانه من خلال هاذي المحادثات الشخصيه حتتحسنين وتطورين نفسك.
وتكفين لاتستحين أنك تغلطين او ما تعرفين تردين. "فشله" "أخاف أغلط"
"ما أحب أحد يحكم علي" كلها جمل محبطه سمعتها من بنات عشان خايفين الغير
يحكم عليهم أو يستهزء فيهم. الواحد عشان يتعلم لازم يجرب مره ومرتين وعشر وراح
يغلط مره ومرتين وعشر بس ذا مو معناته أنه تفقدين الأمل وتوقفين وتقولين جربت وما نفع.
أجل كيف تتحسنين اذا ما تعرفين اغلاطك ونقاط ضعفك! أذكر وحده من معلماتي في الكليه
كانت بريطانيه واذا سمعتني اسولف مع صاحبتي عربي تخليني أعيد السالفه كلها
بالانجلش تعرفون أيش معنى علمتني ان الله حق! كل يوم أرجع وعيوني في الدكشنري عشان
لو سألتني أعرف أرد.
#5
القراءة كنز
القراءة مو بس تساعدك في معرفة
تراكيب الجمل ولكنها تساعدك برضو على الإملاء (spelling) لأنه تعرفين كيف شكل الكلمة مع نطقها. أقرأي وأبدأي بقصص الأطفال
... أنا ماأدري ليش البنات يروحوا ينطوا ع الروايات والقصص الطويله بعدين تصعب
عليهم ويطفشوا ويرموا الكتاب. قصص الأطفال هيه الأساس وفيها كلمات ومصطلحات كويسه
واساسيه.
ليست هناك تعليقات:
إرسال تعليق