نصائح عامه للتحضير المسبق للوجبات من خبرتي المتواضعه والبسيطة:
١/ حددي يوم لتنظيف الثلاجة والفريزر وشراء الأكل الازم وتحضير الوجبات.
٢/ حطي لك قائمة بالوجبات الأسبوعية علشان تشترين الازم لها ويتم استخدامها وما تنرمي.
٣/ حاولي تحضرين وتركزين ع وجبة واحدة سواءً الفطور أو الغداء أو العشاء كبداية حسب انشغالك ولا ننسى الوجبات الخفيفة (السناك).
٤/ الخضار مثل الجزر والكوسا والبطاط والفاصوليا أول ماتشترينها غسليها وقشريها وقطعيها وقسميها في أكياس حسب احتياجك وفرزنيها عشان لو جيتي تسوين ايدامات أو شوربة تكون جاهزه وتوفر عليك وقت. جربت الخضار المشكلة المجمدة من السوبرماركت ماعجبتني.
٥/ مثال ع خضار ثانية جربت افرزنها: البقدونس والشبث. نظفيها وقطعيها ووزعيها في اكياس.
٦/ الخضار المجمدة مثل البازلاء والذرة مفيدة في تحضير الوجبات وممكن تاخذين طازجه وتجمدينها بنفسك.
٧/ السلطات جربت أسوي كمية تكفي يومين مو أكثر لأنه تخرب وتقل فائدتها الغذائية. وحاولي لما تسوينها ماتحطي صوصات وزيوت عليها الا وقت التقديم علشان ماتخرب.
٨/ العصائر الأفضل تتسوى في نفس اليوم لأن برضو قيمتها الغذائية تقل مع الوقت.
٩/ للسموذيز أحب أجمع الفواكة في أكياس في الفريزر علشان أختصر الوقت.
١٠/ صدور الدجاج أحب أسويها بطريقتين إما مقلقل مع الخضار وأوزعها في اكياس وع الثلاجة وعادة اسوي كمية تكفي ٣-٥ أيام ماقد جربت أكثر. أو أتبل الصدور واشويها واحطها في الثلاجة واستخدمها بعدين في السلطات أو ساندوتشات والذي منه. جربت اسلق الدجاج وافرزته بس ماش يطلع فيه ريحه مو حلوه ماأعرف يمكن طريقتي في الحفظ غلط الله اعلم.
١١/ التونه برضو نفس الدجاج أحب أسويها مع الخضار وأحطها في حافظة وع الثلاجة.
١٢/ جربت أفرزن شوربة العدس والشوفان.
١٣/ ممكن تسلقي البيض حسب حاجتك وتحطيه في الثلاجة عشان تختصري وقت.
*ملاحظة: لازم أي شي ينحفظ في الثلاجة او الفريزر مايكون حار لازم تعطيه فرصه يبرد علشان مايتسمم الأكل بس حاولوا ما تخلونه برا يبرد لأكثر من ٤ ساعات في جو حار لأنه البكتيريا تتكاثر عليه.
ليست هناك تعليقات:
إرسال تعليق