مرحبا جميعا
تدوينة اليوم عن مشترياتي الأخيرة من آيهرب كلها أشياء ماقد جربتها من قبل. فابحط كل منتج ووصفه ورابط له
(1)
لوشن مرطب من سيتافيل
الفترة الآخيرة بشرتي صايره مايله على دهنية أكثر فاكنت محتاجه شيء أخف من كريم الترطيب
فاوقع الأختيار على هذا المنتج اللطيف. جربته وعجبني يرطب بس مايكتم البشرة.
(2)
ماسك مرطب من أوبري
كنت أدور على ماسك مرطب وأخذت هذا على مدح أبرار جاسم وفعلاً حلو ومرطب للبشرة.
جربته مره وحده وعجبني.
(3)
ماسك لتنقية وترطيب البشرة من توني مولي
جربته مره وحده وللأمانه أحسه مقلب. أول شيء التعليب من أسوأ ماجربت. عليه زي الغطاء الأبيض
الحامي ولما أفتح وأسكر يسرب في كل مكان ويطلع برا. يخلي زي الطبقه المرطبة على البشرة ممكن
تعجب البعض أو لا. مأقدر أحكم عليه أحتاج أجربه
كم مره.
(4)
أسفنجة أزالة الماسكات من إيكو تولز
وش أقول وش أخلي. حبيتها مره ذا الأسفنجه. أنا أحب أحط ماسكات وخصوصا الطينيه
بس تطفشني وقت الإزالة. فاكنت محتاجه شيء زي ذي الأسفنجه تغرقينها مويه دافية
وتشيلين فيها الماسك سهلت حياتي. وراح أرجع أشتريها أكيد.
(5)
زيت بذور ثمر الورد من لايف فلو هيلث
سمعت عليه مدح كثير للبشرة بس باقي ماجربته. فيه حمض الرتنول أو فيتامين أي لتجديد وإحياء البشرة.
(6)
معالج للحبوب من ألبا بوتانكا
فكرته أنه كريم معالج ولكن مع لون خفيف يخفي الحبوب. عجبتني فكرته خصوصا اذا طلعت لك حبه فجأه وتبغين تخفينها من غير ماتحطين كريم أساس ومخفي عيوب. جربته مره وحده بس ماأعطيته حقه من التجربه. يخفي الحبه بشكل طفيف جدا وأحس يعتمد على نوع الحبه اذا هيه تحت الجلد أو رؤوس بيضاء. ماأقدر أحكم على قدرته العلاجيه لأنه ماجربته بشكل كافي.
(7)
مقشر لللأقدام من كلين هيلين
وحجر للأقدام من إيرث ثيرابيوتكس
طيب أول شيء نتكلم عن مقشر الأقدام الحبيبات الي فيه ناعمه ماتسوي ذاك التقشير.
أعتبره حلو إذا انتي بتسوين مانكير لرجولك وتبغين شيء يقشر على خفيف ورحته جميلة جدا.
حجر الأقدام بطل. أول مافتحته تحسفت لأنه يوم لمسته ناعم مو زي الأحجار الي من السوبرماركت
فاخفت مايسوي شيء بس يوم جربته عجبني يقشر بشكل حلو ماأقدر أوصف كيف بس يقشر بدون عفاشه.
(8)
اليمين: حامي حرارة للشعر من جيوفاني
اليسار: شامبو جاف من جيوفاني
حامي الحرارة جربته مرتين ريحته حلوه ولكن فيه عيب أنه لما تبخينه
يعطي ملمس للشعر دبق بس يروح بعد ماتستشورينه.
الشامبو الجاف بودرة مو بخاخ. أنا متعودة على بخاخ بتيست. هذا أول شيء يحلق في كل مكان حرفيا ههههه.
كان عندي مناسبة ولبسي اسود وأول مره أجربه ماأقولكم كيف صار اللون الأسود مشهب بس يروح اذا مسحتوه.
إذا شعرك غامق وكثرتي بيبان للأسف. يبغاله تحكم وتجربه كم مره عشان أعرف كيف أتعامل معه.
(9)
مزيل البقع من إكوفر
زي الشامبو لإزالة البقع. تحطين مويه على البقعه وتستخدمين الفرشه الي في رأس العلبه وتنظفين فيها البقعه
بعدين تحطينها في الغسالة. عيبه أنه يوم تستخدمين الفرشة الي في الراس، السائل مايوقف يظل يطلع يعني مافيه تحكم
ودي لو أنها مفصولة عن العلبه عشان أحط شوي سائل وأنظف بدون لاينكب كل السائل على بقعة صغيرة.
وخلصنا المشتريات والحمد لله
اذا جربتوا واحد من ذي المنتجات اكتبوا لي في التعليقات تحت.
تقدرون تستخدمون كود الخصم حقي يخفض لكم 5% (ZFJ459 )
تقدرون تستخدمون كود الخصم حقي يخفض لكم 5% (ZFJ459 )
ليست هناك تعليقات:
إرسال تعليق